السر باين والعيون خضارة

السّر باين والعيون خضارة * زاد فـ حلاهم حول الزين
جدلات سود يناوشو فـ الفارة * نحلف يطولو شبر وذراعين
مضحك عزيز صافي نضارة * طيّب لوايع كل قلب حزين
الصدر ضايج والنهود عمارة * سلسال فضة فصل بين إثنين
الطرز مرمر تمدحو النضّارة * تخجل تنبّت ورد عـ الخدّين
لـ حزام منحوت نحت نصارى * يسلب مذاهب كل عقل رزين
الخطو مرشاق مشي حبارة * يا رب إحمي من شرور العين
قدّاش من خطاب زارو دار * في خراجهم عضو المهر مهرين
ما يحار ديما لاقي أعذاره * في بلاصة العيب إختلق عيبين
الأهل قعدو غاضبين حياره * يتصنّتوا وهدر العرب سكّين
لا حدّ بين الناس واعي أفكاره * ولا حد يعرف سرّو وين دفين
عاشق يحارب في خلق نكّاره * لو ترحمو مولى العشق مسكين
شيّع جواب راغب ينول أخباره * خلاه وحده وغاب من عامين
قاصد بلاد الغير قايد غاره * يفدي فـ ثار قديم عندو سنين
فارس سليل السيّدة النغّاره * يا معطّرة بالبركة يا أم الزّين
وفـ يوم جاء مرسال ولد الخالة * بيني وبينك تصبري نهارين
الجاش يقدي لازم نطفي ناره * نلقاك عند الواد نفدي الدّين
قمرة ونسمة والنفس أمارة * وإلّي رشف ريقك خلوقو تلين